ភ្នំពេញ​៖ នៅ​ល្ងាច​ថ្ងៃទី​៦ ខែកុម្ភៈ សម្តេចនាយក​រដ្ឋមន្ត្រី ហ៊ុន ម៉ា​ណែ​ត បាន​ថ្លែង​ជា​សាធារណៈ​ថា រាជរដ្ឋាភិបាល​មិនមាន​គម្រោង​ផ្លាស់ប្តូរ​រដ្ឋមន្ត្រី​នៅតាម​ក្រសួង​ផ្សេងៗ​នោះទេ ដោយ​លើកឡើង​ពី​ពាក្យចចាមអារ៉ាម​ថ្មីៗ​នេះ​។ សម្តេចបានជំរុញឱ្យមន្ត្រីរក្សាបរិយាកាសការងារស្ងប់ស្ងាត់ និងផ្តោតការយកចិត្តទុកដាក់ធ្វើការ។ សម្តេចធិបតីបានថ្លែងដូចនេះក្នុងអំឡុងសន្និបាតបូកសរុបសមិទ្ធិផលរបស់ក្រសួងប្រៃសណីយ៍ និងទូរគមនាគមន៍ក្នុងរយៈពេល ៥ឆ្នាំកន្លងមក និងបង្ហាញពីទិសដៅបន្ត។

នៅចំពោះមុខរដ្ឋមន្ត្រីទាំងអស់ សម្តេចនាយករដ្ឋមន្ត្រី ហ៊ុន ម៉ាណែត បានបញ្ជាក់ជាថ្មីថា សិទ្ធិអំណាចក្នុងការតែងតាំង ឬផ្លាស់ប្តូររដ្ឋមន្ត្រី គឺស្ថិតនៅលើរូបសម្តេចតែប៉ុណ្ណោះ។ សម្តេច​បាន​សង្កត់​ធ្ងន់​ថា «ប្រសិនបើរឿងនេះ នាយករដ្ឋមន្ត្រីអត់បានដឹងផងដូច្នេះសូមកុំមានក្តីបារម្ភថា មានរដ្ឋមន្ត្រីថ្មីនឹងមានការផ្លាស់ប្តូរ »។

សម្តេចនាយករដ្ឋមន្ត្រីបានច្រានចោលការរំពឹងទុកអំពីការផ្លាស់ប្តូរថ្នាក់រដ្ឋមន្ត្រី ដោយបញ្ជាក់ថា បច្ចុប្បន្ននេះមិនមានគោលការណ៍ណាមួយក្នុងការផ្លាស់ប្តូរតំណែងរដ្ឋមន្ត្រីទេ ដូច្នេះហើយសូមបញ្ឈប់ពាក្យចចាមអារ៉ាមទាក់ទងនឹងការផ្លាស់ប្តូរតំណែងរដ្ឋមន្ត្រីទៀត។

សម្តេចបានគូសបញ្ជាក់ថា ការពិភាក្សាទាក់ទងនឹងការផ្លាស់ប្តូរតួនាទីរដ្ឋមន្ត្រីត្រូវបានផ្សព្វផ្សាយតាំងពីចុងឆ្នាំ២០២៤ ដោយលើកឡើងពីការអះអាងថានឹងមានការផ្លាស់ប្តូររដ្ឋមន្ត្រីពី ៥-៦នាក់ ក្នុងពេលឆាប់ៗនេះ ដែលបណ្តាលឱ្យមន្ត្រីមានការស្ទាក់ស្ទើរក្នុងភារកិច្ចរបស់ពួកគេ ខណៈដែលកំពុងរង់ចាំការដឹកនាំថ្មី។

ថ្លែង​បញ្ជាក់ពីពាក្យ​ចចាម​អារ៉ាម​នេះ​ សម្តេច​នាយក​រដ្ឋមន្ត្រី ហ៊ុន ម៉ាណែត បាន​មាន​ប្រសាសន៍ ​«ឥឡូវខ្ញុំសូមប្រកាសតាមនេះតែម្តងទៅ អញ្ចេះខ្ញុំសូមប្រាប់ ព្រោះដូររដ្ឋមន្រ្តីអី បើនាយករដ្ឋមន្រ្តីអត់ដឹងផង យូរៗប្រពន្ធខ្ញុំមកថាខ្ញុំលាក់គាត់ទៀត ព្រោះគេប្រាប់គាត់ៗថាច្បាស់»។ ខ្ញុំសូមអញ្ចេះទី១ណា រឿងការស្នើសុំតែងតាំងផ្លាស់ប្តូររដ្ឋមន្រ្តី ឬមួយសមាជិករាជរដ្ឋាភិបាល គឺជាសិទ្ធិ និងការទទួលខុសត្រូវរបស់ នាយករដ្ឋមន្រ្តី ហើយបើនាយករដ្ឋមន្រ្តីអត់ដឹងផង កុំព្រួយបារម្ភ ហើយបើខ្ញុំអត់ដឹងផង គឺមិនមានក្រសួងណាត្រូវដោះដូរទៀតទេនៅពេលនេះ អីចឹងសូមឱ្យរលត់ទៅរឿងនេះ»៕

ជាងនេះទៅទៀត សម្តេចបានជំរុញឱ្យមន្ត្រីគ្រប់ក្រសួងទាំងអស់ លះបង់ការយល់ខុស ដោយមិនត្រូវប្រកាន់យកគំនិតនៃការផ្លាស់ប្តូរថ្នាក់ដឹកនាំក្រសួង ដោយសង្កត់ធ្ងន់លើសារៈសំខាន់ប្រសិទ្ធភាពការងារ៕